Consecuencias dunha planta de biomasa

Que non veñan con contos! Mirade as consecuencias dunha planta de biomasa. En Canarias téñenno claro. Ence vai deixando “mortos” por onde pasa.

http://goo.gl/SOXvqk

Aplastante contestación social a favor de que Ence abandone a ría

Milleiros de persoas deixaron onte claro, nas rúas de Pontevedra, que Ence ten que marchar da ría para que os pontevedreses poidan recuperar o que é seu: a súa praia, o seu marisqueo, os seus deportes náuticos.

Onte milleiros de persoas dixeron sí á ría de Pontevedra, e non a Ence.

Este foi o seu manifesto:

Aquí estamos, nenas e nenos, pais e nais, amigas e amigos. Amantes da terra, do aire, dos ríos e océanos, da choiva e os bosques.

Aquí estamos as veciñas e veciños de Pontevedra, os que a queremos por enriba de todo, por enriba incluso de nós mesmos, decindo máis unha vez Non ao tumor de Lourizán.

Chegamos de Marcón, de Verducido, de Sanxenxo, de Marín, de Combarro, de Bueu, de Poio, de Ponte Caldelas, do Candán, de Barro, de Arcade, de Toda a ría, de todos os recunchos e vales do interior, de toda a Pontevedra capital e as Terras de Pontevedra, que forman parte do noso ser e da nosa vida.

Somos galegas e os galegos que queremos un país rico, produtivo, frondoso, diverso e no que pague moito a pena vivir reconciliados co planeta e coa marabillosa natureza que nos arrodea.

 

Somos xentes aquecidas pola indignación, pola raiba de ver cómo o diñeiro, a avaricia e a corrupción á que tanto ulen as cloacas do Estado, regalou a uns cuantos ricachóns amigos do Partido Popular, unha parte irrenunciable da nosa alma.

Fixeronlles unha lei á medida, favorecendo o interese dunha empresa contaminante, contra a opinión da inmensa maioría do pobo.

Permítenlles seguir espoliando os recursos do país dun xeito miserable, dedicando a ría a producir capital para uns poucos impedindo o seu despegue marisqueiro, pesqueiro e turístico. 

Mantendo esa lousa negra sobre o rexurdir de Pontevedra, coa súa imaxe sempre baixo a sombra deste noxo.

Son días tristes para Pontevedra, especialmente cando un veciño desta cidade, Mariano Rajoy, impulsa esta aldraxe de 60 anos máis soportando semellante porquería ás portas do mar, en plena ría.

Un clarísimo exemplo de corruptelas e inmundicias. Moi semellante ao aspecto que ofrece a fábrica, unha morea de tubos fumegantes e conexións entre pozos de veneno.

Estamos convencidos de que tras esta escura decisión, opaca, sen luz nen taquígrafos, hai enormes cantidades de capital repartido entre xentes envilecidas polo diñeiro. 

Como vemos cada día nos telexornais, son auténticos especialistas en mercar vontades e practicar a inmoralidade e a corrupción, só ás veces detectada polo sistema xudicial.

Iso é o que pensamos as veciñas e veciños de Pontevedra da enorme hipoteca sobre a nosa paisaxe, sobre a nosa ría, sobre as nosas vidas, contra a inmensa maioría da Corporación, sen que nós poidamos decidir nada porque Fraga, roubounos hai anos ese dereito.

 

Pero nós non imos parar. Queremos recuperar a nosa paisaxe, a nosa cidade, a nosa ría.

Temos folgos de sobra para seguir, e seguiremos reclamando o que é xusto, proporcionado e acaído co medio natural e o Planeta.

Seguiremos en pé por uns bosques diversos e ricos, sen abafantes monocultivos ruína da paisaxe.

Seguiremos esta loita diaria, viva e incansábel contra os delincuentes ecolóxicos, contra a soberbia do poder, contra o a intervención das grandes empresas na política, contra o trágao que Pontevedra xa leva medio século aguantando desde que Ence chegou á nosa ría protexida polos fusís do franquismo.

Seguiremos firmes ata que Pontevedra deixe de cheirar a Celulosas, ata que ese cheiro a ovos podres e esa paisaxe de fumes e ferros deixe de definir á nosa cidade ante todo o que pasa pola autoestrada.

Daremos novas leccións ao mundo, como as que nos están situando como exemplo do que deben ser as cidades sustentables, ecolóxicas, reconciliadas coa natureza, comprometidas co Planeta.

Coa mesma enerxía, tranquilos pero decididos, sacaremos Ence de Lourizán e demostraremos que hai outra maneira de vivir da ría, de desenvolver o noso territorio en harmonía co medio e con miras aos amplos horizontes, non ás estreitas aspiracións dos corruptos e os ladróns de guante branco.

Seremos quen de revertir esta vil maneira de facer política cheirenta, agochada da luz, lonxe da intelixencia e sinónimo de vileza e cobardía.

Ence, fóra da ría para sempre!

Ver máis imaxes en: Outras fotos.

Coñece a vergoñenta resolución do Ministerio de Medio Ambiente ampliando a prórroga de Ence

O mesmo día que o Ministerio de Medio Ambiente lle informa ao Concello de Pontevedra que contestará as súas alegacións ao expediente de prórroga  no informe definitivo, ese mesmo día -20 de xaneiro- tamén sae polo Rexistro do Ministerio de Medio Ambiente o informe da concesión da prórroga. Estes dous informes só están separados por dez documentos que saíron ese mesmo día do Ministerio.

Concesión prórroga de Ence

Contestación ao escrito de alegacións do Concello

O balcón da Casa Consistorial xa recolle o principal clamor da cidade: Ence fóra

faixa_concello_ence-1

A Plataforma Ence fóra da ría colgou esta mañá unha pancarta do balcón da Casa Consistoria, na praza de España, baixo o eslogan “Ence fóra da ría para sempre”. Todos os asistentes fixeron un chamamento á participar na manifestación convocada para mañá pola tarde nas rúas da cidade.

A saída será ás 20.30 horas da praza da Ferraría.

 

Manifestación, venres, 29 de xaneiro, ás 20.30 horas dende a praza da Ferraría

Na Asemblea aberta de Ence Fóra da Ría para sempre de hoxe martes, ante a decisión tomada por un goberno en funcións de conceder unha prórroga a ENCE de 60 anos máis, decidimos, entre outras cousas, celebrar esta semana diferentes MOBILIZACIÓNS CONTRA A PRÓRROGA DE ENCE:

  • Mércores 27 de xaneiro ás 19:00 h. CONCENTRACIÓN na Audiencia Provincial de Pontevedra
  • Venres 29 de xaneiro ás 20:30 h. MANIFESTACIÓN, saída da Praza da Ferrería

 

Concentración, mércores, 27 de xaneiro, ás 19.00 diante da Audiencia

Aprezad@s amig@s

Na Asemblea aberta de Ence Fóra da Ría para sempre de hoxe martes, ante a decisión tomada por un goberno en funcións de conceder unha prórroga a ENCE de 60 anos máis, decidimos, entre outras cousas, celebrar esta semana diferentes MOBILIZACIÓNS CONTRA A PRÓRROGA DE ENCE:

Mércores 27 de xaneiro ás 19:00 h. CONCENTRACIÓN na Audiencia Provincial de Pontevedra

Venres 29 de xaneiro ás 20:30 h. MANIFESTACIÓN, saída da Praza da Ferrería

 

Rajoy concede a prórroga a Ence pero “a loita continúa”

O Ministerio de Medio Ambiente entregoulle esta mañá á ría de Pontevedra á empresa Ence por 60 anos máis. Dúas xeracións de pontevedreses -cando menos- nunca chegarán a ver súas augas libres dunha das fábricas máis contaminantes do Estado. Grande número de colectivos que integran a Plataforma Ence fóra, mantiveron esta tarde unha reunión de urxencia no Consistorio pontevedrés, para facer unha valoración inicial da concesión da prórroga, e acordar manter unha nova reunión mañá, ás 20.00 horas, no Local social da Federación Castelao para fixar as novas estratexias a adoptar, xa que non está todo feito.

A tenente de alcalde, Carme da Silva, o presidente da Asociación pola Defensa da Ría, Antón Masa, e o presidente da Federación de veciños Castelao, Juan Loureiro xunto a representantes dos moitos colectivos que integran a plataforma fixeron unha valoración e fixaron o punto actual de defensa da nosa ría.

Carme da Silva explicou que se trata “dunha decisión de envergadura a de hipotecar e condicionar o futuro de Pontevedra durante 60 anos máis”. E quixo aclarar que era un acordo “vergoñento” dado que tivo que ser anunciado pola empresa e non polo Goberno do Estado, que é quen outorga esta licenza para facer coa ría o que lle pete.

A tenente de alcalde insistiu a decisión “hipoteca o presente e o futuro da ría, levado a cabo por un goberno en funcións, sen lexitimidade, e que non se atreveron a anunciar antes das eleccións”, en clara referencia ao Goberno do Partido Popular, xestionado polo pontevedrés Mariano Rajo.

Quixo insistir en que “pretende regalarlle miles de millóns a Ence a costa do futuro de Pontevedra”, e quixo lembrar que nas últimas eleccións os cidadáns se expresaron claramente en contra de Ence, dado que de 25 concelleiros que ten a Corporación municipal, 17 oponíanse nos seus programas á continuidade de Ence na ría.

“Imos utilizar todos os medios á nosa disposición”

“Imos utilizar todos os medios á nosa disposición: sociais, políticos, xudiciais… para facer fronte a esta decisión, que non é firme, ao  igual que outras decisións ao respecto de Ence”, aclaraba a tenente de alcalde, quen aproveitaba para “facer unh chamamento ao próximo goberno do Estado para que revoque esta decisión”.

Recoñeceu a decepción da Plataforma, na que se integra o Goberno Local de Pontevedra, pola decisión tomada en Madrid e porque “o PP puxese en mans da empresa privada toda a maquinaria política e administrativa do Goberno central e da Xunta, en contra dos intereses dos cidadáns de Pontevedra”.

Carme da Silva instou ás novas forzas que formarán parte do Goberno do Estado a comprometerse a revocar esta decisión “e evitar que isto sega para adiante”.

“Terán que explicarnos as contrapartidas ocultas”

“Terán que explicarnos as contrapartidas ocultas”, concluíu a tenente de alcalde antes de pasarlle a palabra ao presidente da Asociación pola Defensa da Ría, Antón Masa, quen quixo aclarar que “non é unha loita perdida. É unha decisión que ten percorrido, e ímola recurrir”. De feito apuntaba que se pode tratar dunha prevaricación ao outorgar unha resolución cando aínda está sub iudice a caducidade da concesión.

Antón Masa fixo un chamamento “a que a sociedade se revele contra esta decisión inxusta e que hipoteca o futuro da ría”.

Juan Loureiro, presidente da Federación de Veciños Castelao, quixo pór sobre a mesa o papel do presidente da Xunta, Alberto Núñez Feijoo, cooperador necesario para outorgar esta autorización. Lembrou que “en 2009 levaba no seu programa electoral que se comprometía a recuperar a marxe esquerda da ría para todos os pontevedreses; e no ano 2012 dicía o mesmo. Agora terá que explicar aos votantes do Partido Popular por que os engana desa maneira”.

“Pelexaremos na rúa”

Instou a non dar “por finiquitada” a loita e “pelexar na rúa”.

Entre os asistentes estaba o diputado socialista no Congreso dos Diputados, Guillermo Meijón quen apuntou “a falta de gallardía de tres pontevedreses: Rajoy, Pastor e Rojo que agocharon a súa decisión sobre Ence durante a campaña”.

Ence fóra solicita ante Costas que non prorrogue a concesión por 50 anos máis

A Plataforma Ence fóra da ría para sempre visitou esta mañá o Servizo provincial de Costas, dependente do Ministerio de Medio Ambiente, e situado na rúa San José de Pontevedra, para presentar un escrito no que se insta á administración do Estado a non prorrogar a concesión de Ence por 50 anos máis e que reconsidere a súa decisión sobre a caducidade da concesión.

 

AO SERVIZO PROVINCIAL DE COSTAS.- PONTEVEDRA.

 

As persoas abaixo asinantes, maiores de idade e con enderezo a efectos de notificación no apartado 414 de Pontevedra (código postal 36080), en nome da plataforma encefora.gal,

DIN:

Desde que o Partido Popular levou adiante a modificación da Lei de Costas que, entre outras cousas, permite a prórroga ás concesións situadas en zonas de dominio público marítimo-terrestre, quedou claro que a permanencia de ENCE –e mesmo a de ELNOSA- no seu actual emprazamento en Lourizán mais aló do 2018 era un dos seus obxectivos.

Definitivamente, quedou clara a posición do PP verbo da permanencia da CELULOSA en Lourizán, unha posición que para moitos/as de nós era evidente pero que viña sendo negada sistematicamente pola Xunta de Galicia e mesmo desde o Goberno central; en efecto, e –sen dúbida co obxectivo de gañar apoio social na comarca- desde o goberno galego veuse asegurando que, con modificación da Lei de Costas ou sen ela, impedirían a renovación da concesión de ENCE na Ría, unha afirmación que resultou papel mollado. Están decididos a concederlle máis de 50 anos de prórroga na Ría.

E mesmo semella que queren asegurar esta prórroga tomando a decisión antes da toma de posesión do novo goberno para evitar posíbeis voltas atrás no caso de perder as eleccións xerais, unha decisión inxustificábel desde o punto de vista ético que podería rozar a prevaricación pois estarían a tomar unha decisión a sabendas de que é inxusta. En efecto, unha decisión como esta suporía a hipoteca da Ría, dos postos de traballo derivados da explotación racional dos seus recursos e daqueles dos sectores forestal e turístico e impediría, definitivamente, o seu saneamento e recuperación e sería contraria á Lei xa que –moi ao contrario do que sostén a Dirección Xeral de Costas e este Servizo Provincial- existen causas abondo para decretar a caducidade da concesión da empresa ENCE; e non debería esquecer este Servizo Provincial que o Regulamento Xeral de Costas afirma que non se pode prorrogar unha concesión en tanto existan causas de caducidade ou estas estean en discusión, situación que se da neste caso por estar por rematar o proceso de alegacións e recursos. Neste sentido,

ESIXIMOS:

Que este Servizo Provincial de Costas tome as medidas oportunas para impedir que desde o Goberno central se poida tomar unha decisión tan negativa para a Ría, para a saúde e a calidade de vida da veciñanza e para a economía da comarca, absolutamente incompatíbeis coa presenza do complexo ENCE-ELNOSA no seu actual emprazamento.

Que, tendo en consideración as alegacións dos distintos colectivos que teñen actuado como parte interesada no proceso da caducidade da concesión da empresa ENCE, se reconsidere a actual posición do Servizo de Costas (e da propia Dirección Xeral de Costas) e se estimen como causas da caducidade da antedita concesión todas aquelas que –é o caso do incumprimento xeralizado da esixencia concesional de que os seus vertidos non superen as 20 ppm para o parámetro DBO- non deixan lugar a dúbidas sobre tal caducidade.

E para que conste, asinan en Pontevedra a 18 de decembro de 2015

O alcalde de Pontevedra pídelle a Rajoy que non repita o erro da ditadura ao consolidar Ence en Lourizán

O alcalde de Pontevedra, Miguel Anxo Fernández Lores, remitiu esta semana un escrito ao presidente do Goberno, Mariano Rajoy, explicándolle o sentimento do pobo de Pontevedra e da súa comarca; a importancia de non volver cometer un segundo erro histórico que consolidará a Ence na ría para sempre, e as esperanzas de miles de pontevedreses de poder ver a ría libre de contaminación, unha estampa case desaparecida da memoria dos veciños da ría de Pontevedra.

D. Mariano Rajoy Brey
Presidente
Gobierno de España
Excmo. Sr. Presidente,

Diríxome a vostede como Alcalde da súa cidade, en canto que nela pasou unha grande parte da súa vida e a ela, de seguro, volverá no futuro para ficar; fágoo no convencemento de que represento o sentir da inmensa maioría dos veciños e veciñas de Pontevedra e mesmo, a opinión tamén maioritaria da poboación dos concellos da ría; mais fágoo tamén, coa esperanza de que saberá escoitar a este representante do poder local democraticamente elixido.

Quero, a través desta misiva, trasladarlle a inmensa preocupación do pobo de Pontevedra en relación á posibilidade de que o goberno que vostede preside poida cometer un erro histórico que hipoteque o futuro da nosa cidade e da nosa ría: a prórroga da concesión do Grupo empresarial Ence. Un erro que, de cometerse, tería unha repercusión negativa semellante, e mesmo maior, que o cometido o 13 de xuño do 1958, hai xa 57 anos, polo goberno de Francisco Franco, outro cidadán de orixe galega e de infausta lembranza para esta comarca.

A prórroga refírese, como vostede ben sabe, á concesión de 612.500 m2 de bens de dominio público marítimo terrestre, destinado no seu día á construción dunha fábrica de pasta de celulosa Kraft, na zona marítimoterrestre que se ía reencher, abranguida entre o ferrocarril de Pontevedra a Marín e a estrada de unión dos portos de Pontevedra e Marín.

Esta concesión, e a propia localización en terreos gañados ao mar da referida industria contaminante, está considerada unanimemente como unha das maiores aberracións que se cometeron no pasado século dende o punto de vista medio-ambiental, paisaxístico e do propio sentido común, en toda a península Ibérica, ao habilitar a instalación dunha industria de enclave, que nin sequera esgota o ciclo produtivo, nunha paraxe paradisíaca, ambientalmente vizosa e economicamente produtiva.

O complexo industrial, que rematou sendo privatizado, xerou e segue a xerar incontábeis episodios de molestias e de insalubridade, ademais de múltiples problemas polo seu carácter nocivo, perigoso e prexudicial para a saúde humana, sobre todo por emisións atmosféricas e verteduras á ría; chegando a ser condenada a empresa concesionaria, na persoa dos seus directivos, por delito ecolóxico, por contaminación atmosférica e hídrica, por danos continuados a vivendas e cultivos e por faltas contra as persoas.

Hai decenas de miles de veciños que non pasaron nin un só día da súa vida sen aspirar o seu fume, padecer as súas emisións atmosféricas e verteduras á cadea alimentaria, soportar os cheiros e ruídos, e sufrir a presenza desta industria contaminante a escasos metros dos seus fogares; coido que xa sufriron dabondo.

Aspiramos lexitimamente a ver a nosa ría libre de industrias como ENCE-ELNOSA e das súas contaminantes verteduras, nun emprazamento, gañado ao mar, inaceptábel e incompatíbel co desenvolvemento sustentábel e que se tenta detraer ao uso público de veciños e veciñas mediante unha prórroga que equivale, de facto, á súa privatización.

Vostede e eu participamos hai pouco na cimeira do clima en París, e agora temos ocasión de demostrar na práctica o que manifestamos publicamente e de materializar as unánimes arelas que nesa cimeira se manifestaron por todos os gobernos do mundo.

Coidamos que a concesión en vigor debera terse declarado totalmente caducada e non renunciaremos a defender esta postura en todas as instancias, mais o que non se pode cuestionar é que o capital privado que mercou as accións era coñecedor do prazo de caducidade que condicionaba mesmo o prezo de adquisición; pola contra, a prórroga suporía tamén un inxustificábel agravio comparativo con miles de empresas e emprendedores aos que ninguén lles regala o solo que ocupan.

Vostede non pode deixarlle en herdo aos nosos netos e netas unha industria que cada vez xera menos postos de traballo e que mesmo afirmamos que destrúe máis dos que crea (1% do emprego da cidade, 40 % menos dos que tiña cando comezou a funcionar), que impide o desenvolvemento de sectores como a pesca, a acuicultura ou o marisqueo, o comercio ou o turismo, e que ademais, coarta o desenvolvemento urbano da comarca de Pontevedra. Sr. Presidente, a súa cidade chegou a Lourizán e quere recuperar ese espazo público.

A realidade incuestionábel é que ENCE está a impedir a creación de emprego na comarca en sectores
primarios, ao destruír os recursos naturais e, de forma inducida, ao impedir a chegada de empresas limpas, ademais de propiciar o monocultivo de eucalipto do espazo forestal que contribúe ás cíclicas vagas de lume.

Nas súas mans está que non se cometa un segundo erro imperdoábel e irreversíbel para o noso futuro.

Aínda hai tempo para que a empresa marche antes de 2018 a unha localización alternativa fóra da Ría de Pontevedra que permita, asemade, cambiar a tecnoloxía, culminar o ciclo produtivo e crear novos postos de traballo. E se así o decide, terá todo o noso apoio para a recuperación do espazo marítimo-terrestre de Lourizán.

Os pontevedreses e pontevedresas fomos quen de reconverter unha cidade caótica e triste nun lugar que poñen de exemplo en todo o mundo de como se deben construír hoxe as cidades ao servizo das persoas, para que sexan máis habitábeis e sustentábeis, en definitiva para que sigan a ser hábitats humanos nos que se poida respirar aire puro. Mais nese proceso, precisamos tamén continuar as reformas na nosa contorna, porque a alguén se lle ocorreu, no século pasado, colocar o inodoro no comedor da casa, porque a ría é a nosa “despensa” alimentaria, turística e paisaxista; a ría é o noso futuro, non permita que ENCE a secuestre.

Pedímoslle que non outorgue a prórroga a ENCE e esixímoslle que esa transcendente decisión non a adopte un goberno en funcións.

Na súa cidade de Pontevedra, 11 de decembro do 2015
Asdo.
Miguel Anxo Fernández Lores

Os comuneiros de Lourizán súmanse a Ence fóra da ría para sempre

Comunicado da Comunidade de montes de Lourizan:

Este sábado, día 28 de novembro, tivo lugar unha Asemblea Extraordinaria da Comunidade de Montes de Lourizán, na que os comuneiros da parroquia decidiron varias cuestións importantes para o monte veciñal. Pero de entre os puntos da orde do día, cabe resaltar, pola súa transcedencia a nivel social, a votación sobre a conveniencia ou non de sumarse á “fronte anti-Ence”, conformada por varias institucións -Deputación de Pontevedra e Concellos de Pontevedra, Poio, Bueu e Vilaboa- e diversos partidos políticos e entidades sociais, veciñais, culturais e ecoloxistas, baixo o lema: “ENCE FÓRA PARA SEMPRE”.

Os resultados falan por si mesmos, cun apoio moi maioritario a que a Comunidade de Montes se posicione publicamente contra a permanencia de Ence na Ría máis alá do 2018: os votos a favor cuadriplicaron aos votos en contra.

A falta de referéndum, e aínda que se trata dunha mostra pequena, se extrapolamos os datos a toda a parroquia, considerando que cada comuneiro, que representa a unha unidade familiar, e polo tanto, reflicte o sentir maioritario de cada familia, supón que o rexeitamento á prorroga a Ence en Lourizán é moi maioritario en Lourizán. Isto é lóxico, tendo en conta que os seus veciños son os que máis sufren as consecuencias negativas da presenza da fábrica -saúde, cheiros, medio ambiente, marisqueo, etc- e que tradicionalmente as familias da parroquia vivían do banco marisqueiro, aínda que hoxe en día, cada vez son menos e gañan menos cartos polo seu traballo, debido a Ence e as outras graves agresións sufridas pola praia nos últimos anos: EDAR, recheos ilegais do porto, etc. De feito, cando se instalou a celulosa durante a ditadura franquista, a única resistenza veciñal foi a que exerceron as mariscadoras de Lourizán, e pola que foron detidas e presas.

Por outra parte, isto deixa sen argumentos as voces que nos últimos tempos se veñen escoitando, tanto as relacionadas directamente coa empresa, como cos partidos políticos que defenden os intereses da empresa por enriba do interese xeral, cando afirmaban que os veciños de Lourizán apoiaban maioritariamente a continuidade da fábrica contaminante. Parece claro que os veciños da parroquia, que levan 6 décadas convivindo coa pasteira e cos seus perxuizos, non queren, de maneira moi maioritaria, deixarlle como herdanza ás tres próximas xeneracións o que tiveron que sufrir as tres últimas nas súas carnes, pois fálase dunha posible prórroga de entre 50 e 75 anos.

En calquera caso, que as persoas poidan votar, sempre é unha victoria da democracia, independentemente de cal fora o resultado.